शाप

समोर अवचित उभी राहता,

आत मनाच्या हलले काही,

झुळके सरशी निघून गेलीस,

क्षणभर मजला कळले नाही - १

चुकला रस्ता चुकले नक्षे,

फिरू लागल्या दिशा दहाही,

मंत्र फुंकला पडले गारुड,

हतबल झाले रिपू सहाही - २

भूलोकीची नाहीस तू गं,

झरा स्वर्गीचा जणू प्रवाही,

माझ्यासाठी केवळ मृगजळ,

शाप असावा मजला हाही - ३

ठाऊक होते या मूर्तीची,

प्राप्ती मजला होणे नाही,

पूजत आलो रात्रंदिनी परी,

कधी न केला स्पर्श जराही - ४

- सौरभ वैशंपायन