डोईवरी तप्त जाळ
वेढुन टाके सावली
चालले जत्थे कुठे हे
धावती नग्न पावली? - १
ना दिशा ठाऊक कोणा
ना मध्य ना अंतही
थांबेल केव्हा कधी
जी वाट आहे घेतली - २
हुसके कुणी दरडावून
कोठे शिपाई दे शिवी
झाले मोकळे खिसे
ना कटीला पावली - ३
आहे भुकेली दो दिसांची
कुशीत निजली बाहुली
चालला श्रावणबाळ कोणी
घेऊन पाठी माऊली - ४
अगदीच नाही परंतु
दारे मनाची लावली
नाही म्हणाया चतकोर
कोठे मानवता धावली - ५
वांछिल जो ते त्यास लाहो
ही जाणीव जेव्हा जागली
आर्तता साऱ्या विश्वाची
अश्रूत एका मावली - ६
- सौरभ वैशंपायन
No comments:
Post a Comment