कवडसे!

गुलमोहोरच्या फांद्यांतुन उतरावे जसे,
भिरभिरणार्‍या डोळ्यांचे बिलोरी कवडसे. - १

बिलोरी कवडश्यांना दाट काजळ रेषा,
तुझ्या डोळ्यात खोलवर माझ्या हरवलेल्या दिशा. - २

हरवलेल्या दिशांमध्ये सापडलेली वाट,
बकुळ-नाजुक देहाचा कमनिय घाट. - ३

घाटदार देहाला शैशवाचं कुंपण,
जागणार्‍या रात्रींना चांदण्यांचं शिंपण. - ४

चांदण्यांचं शिंपण नव्हे तुझे मंद स्मीत,
तुझ्या ओठी विरघळणारे सायंकाळचे गीत. - ५

सायंकाळच्या गीताला जगावेगळी हौस,
त्याच वेळी असा सुरु व्हावा पाऊस. - ६

पाऊस असा वेडापिसा भिजवी या देहा,
अंतरात जागलेली अनिवार स्पृहा. - ७

अशी स्पृहा जागावी तुझियाही दिठी,
अलगद गुंफाविस माझ्या भोवती मिठी. - ८

-सौरभ वैशंपायन.