Tuesday, July 21, 2020

विठू झाला खुळा

येईना ऐकू, टाळ मृदुंंग,
होई ज्याने दंग, पांडुरंग।।

वाळवंट ओस, पंढरी उदास
रोखलासे श्वास, विठ्ठलाने।।

नाही तुळशी माळा, नाही भेट गळा
ना चंदनाचा टिळा, पांडुरंगा।।

कुठे तुका-ज्ञाना, हरवली जना,
कुठेही दिसेना, दिंड्या-पताका।।

एकटा सावळा, आले पाणी डोळा 
थांबेना उमाळा, माउलीचा।।

डोळा पाणी येई, त्या पुसे रखुमाई
म्हणे मीही आई, लेकरांची।।

लेकरांचा लळा, विठू झाला खुळा, 
म्हणे भेटू एक वेळा, उराऊरी।।

आता होईल पहाट, पहावया थाट,
वेशी वरी पाहे वाट, विठुराया।।

- सौरभ वैशंपायन

No comments: