स्पंदन

 

एकांताची वेळ असावी 

चंद्र दडावा मेघांमागे,

अबोल रात्री अवचित व्हावे 

दोघांमधले स्पंदन जागे. - १

कानामागील केसांमध्ये

जड थोडासा श्वास जिरावा,

अवघडलेल्या मौनामध्ये 

शरणागत हुंकार विरावा. - २

अनोळखीश्या दो देहांना

क्षणात यावी अनाम भरती,

उत्सुक उत्सुक हात फिरवे

अंगांगातील वळणांवरती. - ३

अधीर आसुसल्या ओठांना

ओठांकडूनीच धीर मिळावा,

संकोचाच्या पडद्यामागील

कुशीत दडला अर्थ कळावा. - ४

 - सौरभ वैशंपायन